Il mund ester limitescha gugent nossa musica a la dultscha armonia da la «Buna not, dorma bain». Ma nus savain, quai n'è lunschor betg l’unic hit rumantsch. Da la vart culturala brigliescha la Rumantschia oravant tut cun sia tradiziun da chors, cun chors virils, chors maschadads, chors da project. Ma i dat era chors cun tendenzas modernas, p.ex. ils Incantanti, ina viscla truppa da scola media ch'entusiasmescha dapi intgins onns il public sur tut ils cunfins.

  

Dapi decennis exista er ina ritga scena rumantscha da rock, pop e chantautur*as. Veteran*as sco Paulin Nuotclà, Corin Curschellas, Pascal Gamboni u el mar treis fan part da quella, ma er nums pli giuvens sco Mattiu, Martina Linn, ladunna, Bibi Vaplan, Ursina sco er ils rappunzs Giganto, Snook u las Liricas Analas – deplorablamain schliadas. 

En il center dal FESTIVALET stat damai la musica rumantscha, la tradiziunala sco era la contemporana. Ma er autras spartas artisticas han qua lur plazza: ina prelecziun litterara, ina performance da slam poetry, ina projecziun da filmets u in'exposiziun d'art. Ins po era tadlar in referat davart il tema quarta lingua naziunala. En in program da famiglia pon ils pli giuvens intunar chanzuns rumantschas ensemen cun Ursina. E dal reminent, capuns duai er dar al FESTIVALET, delicatessas damai da la cultura culinara rumantscha.

 

Per in tal event èsi inditgà da tscherner ina localitad generusa cun pliras tribunas ed in ambient adequat. Il FESTIVALET avra perquai sias portas en in lieu enconuschent per eveniments da tuttas colurs – al (Palais) X-TRA sco er a la Johanneskirche vischina, tut collocà al Limmatplatz da Turitg.

​​

​

X-TRA Haus der Musik
Limmatstrasse 118
8005 Turitg

 

Johanneskirche
Limmatstrasse 112
8005 Turitg

​​

​

Colliaziuns dal traffic public: Ils trams nr. 4, 13 e 17 ed il bus nr. 32 enfin Limmatplatz